高sir講樓篇 - 港島灣仔區 : 囍滙2期

Topic: 皇者灣仔注目盤

(圖): 呢期港島盤最紅係佢, 其次上環間Imperial kennedy 都唔弱

        呢個週末輪到地產篇第二回, 今個week再踩過界, 講吓地產~ 上期講果間筲箕灣樂融軒, 本月尾開賣, 市場暫時收票2000幾張, 叫做meet target. 今期有兩個盤大熱, 分別係東涌昇薈, 同埋灣仔囍滙~ 呢兩個盤近日係地產界Hit爆, 連駐紮係將軍澳的經紀都打比小弟, 有冇興趣去睇下~

        今期先講下灣仔既囍滙, 灣仔咁多盤單憧盤, 囍滙最受人注目, 睇個”囍”字最知佢係邊度, 多得謝安琪首囍帖街, 相信令到本來唔熟灣仔既人, 都知道灣仔有一條充滿印製囍帖既街道, 唔少人當日拆”囍帖街”既店舖, 大嘆可惜, 但香港人對住昔日情懷, 講真一向得果三分鐘熱度, 皇后碼頭拆果陣, 呢人喊哂口好似女皇駕崩咁, 但過左陣已經習慣, “囍帖街”一樣, 時代變遷下, 講番”囍帖街”大多人開始第一時間諗起”忘掉愛過的她”既謝安琪, 或者你會諗起蘇永康, 但開始冇人諗起灣仔, 由市建局拍住信和同合和一齊攪既囍滙二期, 就係重建主要項目之一, 起果陣又話將充滿人情味的地方變成豪宅區大力反對, 又喊哂口話呢度有好多回憶, 到項目一推, 入票超標近七倍, 反應熱烈, 無它既, 地點的確理想, 灣仔喎, 對返工一族何其方便, 灣仔區本身已是商業區, 距離金鐘, 中環坐港鐵不足10分鐘直達, 出九龍油尖旺經金鐘過海, 半小時內到達的區域, 難怪地皮價值甚高, 講真, 玩過大富翁的朋友都知道, 唔同地段收既路費都唔同, 買中灣仔銅鑼灣同中環, 邊有得輸嫁!

(圖): 示範單位就靚硬嫁了, 一房單位入門口基本上咩都睇哂.

       講番呢個盤, 用料方面做足, 雖然, 早前蘋果動新聞報導左單位間隔騎呢, 有房間竟可打開窗直頭同廁所辦緊工條友握手, 單位又四尖八角, 兩個露台又細過咩咁, 一梯又有十幾伙人, 但一切都算啦, 因為果度係灣仔, 灣仔就係灣仔, 塊地皮靚就咩都得~

        囍滙以單幢式賣, 合共1096伙, 設有3座, 一房至三房單位, 最細由實用面積340呎左右起, 開放式廚房, 實用呎價平均約$18500左右開售, 講真係灣仔呢個黃金地段唔算太貴, 叫做買得過, 嗱~ 我話買得過唔等於買黎住得過, 買黎放租租出去回報相信幾可觀, 或者咁講, 應該幾易可以放得出去租, 當然啦, 要有所謂閒錢先可以做到呢回事, 買黎住就一般般, 間隔令人嘔心, 呢類灣仔小品細樓相信只係岩青年形格夫婦只係係屋企打吓機, 玩下煎牛扒或請幾個老友上來飲兩杯, 你話落地生根就難d, 雖則話哂有大單位, 但兩房單位基本上都過20000蚊一呎, 唔值~! 一家大細住唔會諗住住幾年搬, 用呢個價買呢個則, 唔好亂諗~

        囍滙個會所據報有50000呎, 呢下令人有d期待, 係九龍或者新界既大型豪宅, 靚會所屬基本設備野, 除非好豪華否則不值一提, 但係港島線, 灣仔中西區既樓有個靚靚地又大既會所, 簡直係皇恩浩蕩, 住開港島樓既大約都明白講咩.

(圖): 個人來講, 信置比人感覺唔錯既, 質素仍有一定保證.

(圖): 六百呎兩房過千萬嫁了, 即係咁, 用黎住我就唔贊成咯.

(圖): 39平方呎的辦大事房, 受盡惡評.

                                                               高Sir評價:

基本因素:  此屋苑步行至港鐵灣仔站只約5分鐘步程, 交通以港鐵為中心, 往來巴士/小巴/電車/四通八達, 區內商業住宅混合為主, 對於中上環, 尖東等上班人仕而言, 可謂十分方便. 交通冇得輸.

娛樂/食店方面: 灣仔本身酒吧臨立, 唱K, 商場等不乏, 步行至胡忠附近設立不少具質素的樓上食店和品酒食店, 動靜皆宜講得上, 出入銅鑼灣, 尖沙咀等購物旺區和娛樂區又極為方便. 對於食/玩, 贏得!

(圖): 唔好諗有海景, 山景, 只有樓景, 樓同樓都幾密下.

環境方面: 人流較多, 人口密度為較高之區別, 想休閒寧靜唔好諗, 想行下公園可謂發緊夢, 鄰近有個灣仔公園, 但只係地方細細, 中間有個七人足球場之類的公園仔, 附件綠化等欠奉, 車多人多, 小型街市係附近, 小動作或許間中見到~

校網方面:  

小學著名校網: 瑪利曼小學, 聖保祿天主教小學, 聖若瑟小學等

中學著名校網: 皇仁書院, 瑪利曼中學, 聖保祿中學, 真光中學等.

屬A級類別, 入唔入到另一件事~

地值潛力: 當然, 灣仔地皮價值唔駛諗, 地區有點老化, 但陸續清拆重建後他日地皮價格不敢想像, 投資一流, 注意一點, 政府曾提及把香港經濟商業中心區東移至東九龍. 但相信以政府效率該十年內難以成事.

綜合價價: 

(圖): 露台原來貼住隔離屋, 屋企冇油冇糖可以伸手借喎~!:)

要買來做炒賣賺錢, SSD下這項目要短線大賺應該就難D, 但如果話買黎出租比客住, 長線來講這項目仍有吸引力, 單位間隔, 露台雖則比人感覺揾笨, 但咁諗, 如果係附近中心區上班, 租客應該唔會太介意個房可以同辦緊大事既朋友握到手, 又咁講, 無論租客或住客, 問心有幾何拿住杯紅酒, 係露台欣賞人生百態丫, 個露台其實裝飾一下, 通下風啫, 大家諗多左.

總括來講:

用來放租. 上佳.

用來自住, 唔好了.

用來長線等升, 可以既. 長線講至少5年丫.

  

文: 高俊權

2013-11-25

最新投資動態!!!! 請按 –Fanpage like!! –

Facebook Fans page: http://www.facebook.com/yahookosir/

.<以上是筆者個人意見, 沒有任何建議和推介成分>

筆者博客:

香港讀者請觀看: Blogspot: http://kokokeiko.blogspot.com/

頭條網: http://blogcity.hkheadline.com/kokokei

國內朋友請觀看新浪博客: http://blog.sina.com.cn/u/1747429404

高SIR講股篇 - 有冇錢, 睇你EQ!

Topic: 有冇錢, 睇你EQ!

        上週出左篇講地產, 得到不少讀者良好回覆, 真係諗都諗唔到反應咁好, 早知我一早就寫多幾篇地產, 寫下寫下可能寫到本”地產筆記”都未定, 踩過界玩地產篇就唔可以扮專家了, 一個禮拜出一篇有關地產, 對我來說已岩岩好~

 

(圖)好啦喎, 有冇理我係$2.9沽出既感受先! :)

        算啦! 正所謂: 有早知, 冇乞衣啦! 早知我隻維達(3331)咁爆, 又早知我隻農行(01288)到我目標價$4.1, 又早知隻東航(0670)識飛既, 我hold住就賺大錢啦, 其實要檢討一下, 有時太過穩陣的投資方法, 講好聽d就叫穩健投資派, 實際上就係叫”冇發達”啦, 隻隻賺左少少就走, 最慘就係沽出後連接的升浪, 其實有句話好岩, “止賺比止蝕仲辛苦”, 止蝕最多都係比人斬頭, 一刀過最多都係噴血啫, 但止賺就慘了, 錢落左袋願來反而更加不安~~ WTF!

圖): 你諗下如果你咁有錢, 比人咁樣攪,
仲要向住傳媒笑笑口, 唔係好多人得嫁咋~

        相信大家都有過呢個經驗, 就係好沽唔沽, 一沽隻股就一飛沖天, 其實真係冇咩人可以接受到, 眼白白睇住沽左隻股係咁升, 已經去到頂層級數EQ的我, 有時候都會向住個芒粗口横飛既時候, 唔好睇少EQ呢兩個英文字, EQ其實是決定你能夠成為有錢佬或否的一個主要基本因素之一, 你試下代入李嘉城比人畫埋個李氐力場圖出黎都笑笑口對住傳媒, 或者你試下代入TVB個老頂, 生日樓樓比人係門口同你打堂齋, 仲要笑笑口出來話好滿意成績, 你不得不敬重其實富人有富人的特質, EQ可謂高過天~

        股市呢排就好睇了, 23800點有一刻曾經突破, 本月中終於到左我成日講既23800點, 理論上不是向24200點推進嗎? 本來就係既, 但市況又去到中後段, 期結前比番淡友們揾番啖食都要既, 加上年結在即, 你唔係叫基金佬係23800點掃貨下哇, 掃都掃唔落手嫁, 市況有機出現短暫回吐浪, 下週初如果恒指回吐見22900-23200點區域, 入番呢股都係時候~~

        今天股市下跌, 藉口是市場擔心美國退市重臨, 好話唔好聽, 呢一個退市而下跌的問題, 已經困擾恒指一整年時間, 即係咁講, 如果退市, 即係代表美國經濟從谷底回升, 咁跌咩Q呢? 佢話退唔到市, 因退市個市場唔掂喇, 你反而驚D都未定~

        股市係好奇妙既, 其實咁講, 股市好悶既, 升跌的藉口會令新手摸不著頭腦, 係股海有3-5-7年既朋友, 更加係最易死的一群, 因為擁有不少技術分析的理論, 亦係股市賺過吓錢, 呢一個階段的投資者, 最有自己果一套, 無論你是幾苦口婆心, 這個階段的投資者都唔會理你, 而好似我呢D係股場都十幾年既老坑, 相信都早已看透股票是什麼一回事, 總括來講, “如果你識止賺, 你就是贏家!”

 

圖)12月或者炒佢一轉, 莎莎國際(0178)

        12月部署咩股好? 今次唔買匯豐(0005)了, 我唔係話佢唔得, 持有匯控的朋友, 下月有機進一步見$88~$92區間. 但你話破紅底的話, 我認為機會不大, 升到月中幾乎都係同一個循環咁跌番一個禮拜, 聖誕新年長期前股市例悶, 要破紅底? 今年無望~

        下月, 我睇恒指該見23800 ~ 24800點區間上落, 當然啦, 我保障下自己講句, 我計數出來最盡係呢個區, 你話如果美國佬突然退市, 或梁特首突然手痛請辭, 呢D股市消息我預測唔到既, 又講下隻中移(0941), 自從阿爺唔想佢一台獨大之後, 呢個階段的股價似乎去到底, 我相信股價如見$78風險唔高, 但要守幾耐先去番$86~$88, 或許要等匯豐升到頂, 大戶先行沽匯控掃中移動, 有排啦~~

        前幾日買入左隻好孩子(1086), 一孩政策的結束點睇都有利呢類股份, 當然啦, 懷胎10月生多個都要時間, 更加唔好講生多個對經濟刺激有幾大住, 短炒來講再大升就要等下個浪, 春節臨近前呢類股該又再比人提起, 如果肯放個中長線, 未來一至二年, 呢類股絶對有機跑贏大市表現, 可以留意一下.

        隻第一視頻(0082), 呢隻股最近開始動作多多, 但股價要升就升唔起, 分析出來的業務所得盈利該會在來年報告上入賬, 盤數問題不大, 至少好過上年嘛, 但長線持有就唔多理想, 派息一件事, 其次佢業務係就係賺錢, 但賺錢能力唔係好高, 股價爆破$0.82後, 該可推進見$0.88~$0.92區, 如果市況配合, 見高$1.2仍有一點點, 一點點機會.~~搏唔搏, 自己諗吓.

 

        最後講下隻港交(0388), 終於到返到家鄉啦, 當日, 叫高SIR果位投資人, 係港交(0388)同騰訊(0700)二選一, 貪隻港交所穩陣D買左佢, 結果幾乎坐左一年, 息口雖然唔錯, 但隻騰訊(0700)就已經爆左一倍, 持有港交所的朋友, 股價近日升幅過急, 有機先回吐至$136左右整固, 新股潮反應不錯, 加上大型股續來港上市, 隻阿里巴巴又姣婆守唔到寡, 考慮下年來港, 港交所股價近排有運行, 短線整固後便該會爆升, $148是初步目標, 最終該可見吓$152關.

(圖): 港交所(0388)去唔去到$152或以上, 就睇佢點了~~~

文: 高俊權

2013-11-21

.<以上是筆者個人意見, 沒有任何建議和推介成分>

筆者博客:

香港讀者請觀看: Blogspot: http://kokokeiko.blogspot.com/

頭條網: http://blogcity.hkheadline.com/kokokei

國內朋友請觀看新浪博客: http://blog.sina.com.cn/u/1747429404

最新投資動態!!!! 請按 –Fanpage like!! –

Facebook Fans page: http://www.facebook.com/yahookosir/

2013年度短炒組合

短炒 / 即日	買入價	沽出價		獲利	策略
中化肥(0297)	$1.65 x 40000				目標平盤走
中移動(0941)	$86.75 x 1000				目標$88~$92
港交所(0388)	$137.5 x 1000				目標$152
好孩子(1086)	$4.03 x 10000				目標$4.6
		2013年沽出
農行(1288)	$3.64 x 20000	3.9 x 20000		$5200	2013年11月
東航(0670)	$2.61 x 30000	$2.88 x 30000		$8100	2013年11月
創維(0751)	$3.64 x 30000	$3.89 x 30000		$7500	2013年11月
維達(3331)	$10.02 x 6000	$10.96 x 6000		$5640	2013年10月
牧業(1117)	$2.74 x 20000	$3.24 x 20000		$10000	2013年10月
		1-11月 (2013年短炒增長)		$36440
2009短炒增長		$198615(198.6%)
2010短炒增長		$ 80400(40.2%)
2011年短炒增長		$ -4620 (-2.31%)
2012年短炒增長		$22840 (11.4%)
2013年短炒增長				$ 36440 (18.2%)	以約20萬本金計算