2014-02-19日開始 - [連載中]
一段潮片, 令人有百般的深思, “公屋. 居屋. 私樓” 在今時今日的定義, 也不得不佩服時下年青人的創作和製作, 劇中充分反映了現實社會上的問題, 公屋戶, 居屋戶, 私樓戶在不知不覺間, 已經產生了巨大的比較, 社會的階層有如印度社會般被貧富所撕裂, 值得我們一再深思...
當然, 潮影片中的製作團隊找來了盧宛茵, 好一個盧宛茵, 好一個好戲之人,才能夠把每一層面, 每一個階層的人, 充分表達了所有情感於面部表情上, 我們不難發現, 今時今日, 社會上充滿了無知的白鴿眼, 有人因為聽到你住公屋, 便肯定你是低層人仕, 住私樓的定位, 便是有希望的上等人, 這的確是社會上最大的無知, 今時今日, 假如我的未來女婿與我見面, 我會慶幸他的娘家住公屋, 而對於劇中最近購入珀麗灣的私樓有為青年, 我會叫女兒離開佢, 姑且暫不講那位東旭苑的居屋戶…
-------公屋--------
劇中五年後的畫面, 好有可能如是, 那一位娘家住在秀茂坪而非觀塘的公屋戶, 因為父母都住在公屋, 五年後他們開始計劃結婚, 由於公屋戶每月在居住租金只有$2000樓下, 且秀茂坪位置還好, 來往九龍或港島工作, 交通費用搭下不算重負擔下, 這位公屋小子相信五年後隨著人工/ 職位的增長, 以及家庭擔子在最輕的負擔下, 結婚不成問題, 由於父母已經有一所穩定公屋, 五年後面對的問題, 只是如何買一間房子, 過著婚後兩口子的生活. 看一下這位公屋仔, 日後生活是怎樣.
今天的公屋仔: 五年後, 在娘家每月平均屋租只是$2000或以下, 負債為0, 出入只有交通工具的情況下, 五年後儲一筆錢該是能力做到的事, 攪唔掂父母可以用綠表抽屋居, 最壞情況下最多一齊住, 唔想咁~ 當然最理想父母住住一間公屋, 自己腳踏實地向上, 五年後樓價跌到咁上下, 兩口子買一間屋, 五年後你能夠一炮過買到, 咁就係神話級, 變番普通人, 咁你比首期, 月供, 做埋孝順仔比埋間公屋租金, 父母退休唔用食老本, 因為你負擔唔係大, 多比少少父母是可以的. 老板如果小你, 你可以玩個悠長假期, 同老婆去個短程旅遊開心下, 一年去多一次兩次旅行是可以的, 點解呀, 喂, 兩個青年, 供一間屋, 屋企無咩負擔, 吹呀~ 呢幾年, 你可以安心去玩, 手上兩口子供一層樓, 到層樓一升值, 或者你投資股票得利, 又或者香港房產又炒起, 黃大仙公屋交投神話又出現, 恭喜哂.~)
-------居屋--------
好喇~ 到講下果位居屋仔, 家人住港島東 - 東旭苑, 計番當年百幾萬買番黎的入手價, 或許可能未供斷, 2000年左右入伙, 計番如果當年借佢30年, 借足九成上車, 百幾萬供30年呢幾年低息, 每月支出唔係咁, 今天計已經幾乎供左一半, 好喇, 計埋呢五年內的加息週期, 負擔你話好大唔係, 但唔好話冇, 一點點罷~ 當然, 如果家人係買斷左, 呢五年內只係計下物業下跌的風險, 大不了最多去番200幾萬, (哇, 而家白表要4字頭嫁, 比起而家都跌左成百粒了), 未至於話蝕入肉, 你最多只可以話佢升唔到值, 但阻唔到個仔結婚, 五年後, 這位朋友因為父母有一層屋居, 樓市五年內的冷卻下, 父母幫唔到呢位青年, 但未至於是一個負擔, 那一層居屋, 可以用來養老, 環境總比公屋理想, 想發達 Sorry冇你份, 因為一係你要供埋父母既樓, 唔駛供既話父母都無可能話我唔住, 而去租間板房, 餘下呢錢比哂你結婚果種, 即係父母自己攪得掂, 顧你唔到果隻, 港島無論食野, 交通費, 都比起九龍新界貴, 看一下這位只能夠食雞胸肉既居屋仔, 日後生活是怎樣.
今天的居屋仔: 每月月入的增長, 扣除比番丁點屋企做下家用, 由於屋企層樓負擔唔係大, 可按自己收入比多比少, 壓力唔算大. 交通伙食費係港島是個問題, 儲錢係有但唔夠多, 指意政府, 但政府幫你唔到, 因為你屋企住緊居屋, 想申請公屋唔可以, 申請多一間居屋要用白表價, 即係昆人用連埋補地價去買間居屋, 梗係唔順氣! 五年後, 儲了一點錢, 問屋企幫補下少少, 夠錢結婚了, 叻仔的話自己比個首期, 五年後樓價跌得七七八八, 借佢30年, 做吓樓奴, 呢30年內, 每月的收入扣除供樓, 比下雙方父母, 有一點盈餘的, 兩口子一年可以去一次旅行, 仔女可以去學下野, 得閒同父母飲個茶, 你唔好日日去飲茶, 因為你絶對唔好比人炒, 炒左你就中招攪唔掂, 即係, 工作上點都要睇老細面色, 佢叫你上刀山, 你上夠兩座比佢, 保持個飯碗, 直至仔女出身你捱完. (當中, 如果週期循環, 層居屋, 或者自己買果層有機會在大循環下升值, 以及多餘錢有靠股票, 唯一上位方法係呢兩味, 幾時? Q知幾時東旭苑一層居屋又炒見600萬咩~ 呆捱LOR.)
---------私樓-------
劇中, 那一位上月買下珀麗灣的所謂 ”上進”青年, 即盧苑茵眼中的絶對荀盤, 連約左未來外母第一次食飯都遲到一個鐘的靚仔, 五年後大家想像一下過著怎樣的生活? 樓價在今年入市的話, 加息週期的開始令這位荀盤百上加斤, 現任梁特首的打壓房產政策, 另私樓在這幾年間的升值力完全消失, 五年後, 樓價或許比較今天下跌超過兩成或以上(我已經好Q保守了), 而這位荀盤今天和朋友合組的公司, 五年間過著收入不穩定, 市區租金的蠶食下, 所謂的Project收入, 相信大部分已抵銷他的高昂支出, 支出為: 供樓, 車位租金(片中荀盤有車), 做生意的office 租金, 暫且不計算其父母退休後, 所住的私樓供完未, 未供完即係呢位荀盤要供埋佢, 五年後, 你唔賣車, 我已經話你好野~ 在我筆下, 自組公司攪生意的收入, 可以抵鎖以上種種支出, 攪過生意既朋友一定知道, 已經叫做好Q成功, 我個女嫁著你, 同你一齊揹住兩間要供既私屋 (一層咁Q靚既珀麗灣, 供埋嫁靚車, 珀麗灣仲要係無煙城, 車位+平日交通出番去做野的費用, 恭喜你罷~), 如果係我個女, 咁即係點先? 除非你好有米, 你話有幾千萬做backup,
全智賢講既: Oh~ Sorry~~~.
看一下這位能夠食雞脾的私樓仔, 日後生活是怎樣.
今天的私樓仔: 五年間的收入多少唔計了, 或許你抄左神魔, 無端端有幾億我講唔到咁你勁罷, 計一下負債: 每月供兩間樓, 車租, OFFICE 租, 兩間屋一間仲好有可能係負資產, 喂, 點解呀? 如果你話五年後珀麗灣升到有1000萬既, 我錯LOR, 但保守計下跌2成好未, 現價500萬, 兩成賬面上坐緊100粒. 你冇得蝕賣, 賣左你同老婆唔知住邊, 供就一齊供, 供呢間或許仲要供埋老豆老母果間, 供唔掂就是但賣一果一家玩樂融融, 每月收入好彩唔駛倒貼已經好好, 月光族是常識, 有錢都去左供樓, 你唔能夠投資股票, 因為一旦唔好彩, 冇多幾十個就妻離子散, 想換樓, Sorry 喎, 樓市下跌週期你一係蝕賣, 你負資產, 加上攪生意冇租定收入, 銀行唔借錢, 同父母得閒去茶記食野冇咩問題既, 旅行… 有錢都用來比office 租, 供樓錢啦, 生多兩件賣仔都唔掂~
好! 抽完呢段”潮” 電影既水, 有興趣把我這個劇本拍成電影或微電影的朋友, 請與我直接聯絡, 我只想收番我創作版權編劇費用, 就咁話. 我深信我講得應該無咩錯罷.
---------寄語-------
[社會上最悲哀的事, 並是不來自各個斷層所造出來的貧富矛盾, 而是連自己身處的位置也弄不清, - 優勢和劣勢, 正確與錯誤 - 都分不清的年代, 是社會一個最殘酷的悲歌…]
你係盧宛茵的話, 會唔會比番碟雞阿公屋仔?
利申:
70年代, 公屋出身.
住過居屋, 正正東旭苑對面居屋王愛蝶灣
現已擁有私人物業, 所以我最Q明白三層人不同感受罷.
2014-4-7
文:高俊權
-------------------------------------------------------------
<炒股人的投資日記 - 按日更新 >: 按每日筆者的買賣動作, 市況, 心情, 隨意寫上幾句, 當中會透露一下筆者對大市或個別消息的想法
<高Sir 講股> : 詳盡的文章分享, 收錄筆者對後市, 持貨組合, 個別股票的看法.
文:高俊權
-------------------------------------------------------------
<炒股人的投資日記 - 按日更新 >: 按每日筆者的買賣動作, 市況, 心情, 隨意寫上幾句, 當中會透露一下筆者對大市或個別消息的想法
<高Sir 講股> : 詳盡的文章分享, 收錄筆者對後市, 持貨組合, 個別股票的看法.
最新投資動態!!!! 請按 –Fanpage
like!! –
.<以上是筆者個人意見, 沒有任何建議和推介成分>
筆者博客:
沒有留言:
張貼留言