牛市三期, 跌一天, 彈幾天- from yahoo blog Jan 4, 2007

昨晚寫網誌時美國果邊大升百多點, 仲諗住收工訓覺等收錢之時, 一早起來見老美只升11點, 心知不炒. 原來又係受加息減息的預測所影響.

港股今天來一個暴跌式下跌, 日經半天市升百多點. 外圍造好下, 港股拾級而下. 一度跌四百多點失20000點支持位. 相當恐怖. 特別係國內首個交易日, 人人都認為會炒到變火箭之時. 收市後多左好多淡友聲音. 又話會跌多幾百點至19400點先停. 我認為明天升跌好睇外圍. 講真, 今天跌市一定係中計, 冇任何不利因素下攪d咁既野, 仲要係, 成交大到7百幾億, 係歷來既第二大. 成交配合好明顯係高位散貨. 但我相信一日下跌左4百點, 若今晚美股表現可以的話, 明天反彈可期. 但點都好, 明天係假期前, 若有機會該先沽貨走人稳陣.

<< (1044) 恒安國際到達$20元 >>

愛股1044恆安今天終於企稳$20元收市, 早前該股由$17~$19元附近整固多時, 現在突破主要阻力, 向上會試頂, 早前投資公司美林出左報告, 目標價$22 如下:

   "美林發表研究報告，予恆安國際<1044.HK> 「買入」級評，目標價由20.2調高至22元。

該行表示，雖然紙漿價格上升，但恆安之紙尿片銷售增長較預期高，而且將於年中推出高檔嬰兒紙尿片，可助改善競爭力及毛利，加上人民幣升值及化工成本下降等利好因素，故提升恆安明年的盈利預測6%至10.69億元。" 

我個人相信恒安今次整固完成, 參考上次升浪既經驗, 上一次升浪由$12.5附近起飛到$18元左右, 升幅大約40~50%. 故今次確認升浪後, 股價見$25元可以預見. 而由於人民幣升值加快. 人民幣升值令該集團用料成本下降. 對該公司利好. 故恒安三月公布業績前好可能會慢慢上升. 可以留意.